Quai è Vossa contribuziun

Sco directura / directur RTR surpigliais Vus la responsabladad per la pli pitschna unitad regiunala da la SRG SSR – ed il medem mument ina rolla centrala en l'entira organisaziun naziunala. Vus essas commembra / commember da la direcziun naziunala da la SRG SSR ed influenzais là las directivas strategicas da tut la SRG SSR. Vus manais RTR sco directura / directur e garantis che la perspectiva rumantscha vegnia integrada activamain en la strategia da medias naziunala.
Vus concepis l'orientaziun strategica da RTR en accordanza cun l'incumbensa dal service public e cun la concessiun e realisais la strategia d'interpresa da RTR cun focussar la transfurmaziun digitala, augmentar l'effizienza e cun sviluppar vinavant in'organisaziun da medias moderna adattada al public.
Vus essas responsabla / responsabel per las purschidas linguistic-regiunalas ed ils chanals da distribuziun. Vus promovais la collavuraziun interdisciplinara era sur ils cunfins da la regiun linguistica, identifitgais sinergias e faschais avanzar l'innovaziun. Vus represchentais RTR e la SRG SSR vers la politica, las medias e la societad e gidais a garantir che la chasa da medias publica restia relevanta per il sistem.
En il rom dal process da svilup strategic ed organisatoric «Enavant SRG SSR» concepis Vus activamain la nova orientaziun strategica e la transfurmaziun da la SRG SSR e da RTR – en ina fasa marcada da sfidas finanzialas, da midadas quai che reguarda l'utilisaziun da las medias e da la concurrenza internaziunala pli e pli gronda. La SRG SSR sa sviluppa d'ina «SRG SSR da las regiuns» ad ina «SRG SSR en las regiuns» – a quella midada contribuis Vus decisivamain.

Uschia ans intgantais Vus

• Persunalitad directiva integrativa: In agir orientà a las valurs e la participaziun èn per Vus centrals; Vus promovais talents ed ina cultura da manaschi diversa ed inclusiva
• Visiuns strategicas: Vus sviluppais RTR sco part da la SRG SSR e quai a moda consequenta e prospectiva, identifitgais trends socials e tecnologics e realisais quels en strategias persistentas
• Cumpetenza digitala: Vus chapis las pretensiuns ed ils connexs tecnologics dad in'organisaziun da medias che sa basa sin datas e faschais avanzar la transfurmaziun digitala cun forza innovativa e cun l'orientar al public
• Fermezza communicativa: Vus communitgais a moda transparenta e persvadenta – a l'intern e vers anora – ed essas ina vusch credibla per il service public medial
• Senn da responsabladad: Vus agis en vista a l'entira organisaziun, impundais las resursas a moda effizienta e garantis la qualitad schurnalistica era sut cundiziuns da basa pretensiusas
• Enragischaziun linguistica: Vus discurris currentamain rumantsch, idealmain sco lingua materna, e chapis da far valair la cultura ed ils giavischs da la cuminanza rumantscha sin plaun naziunal